Ein Cyllidwyr

Rydym wedi derbyn y rhandaliad olaf o £10,000 gan Ymddiriedolaeth Bannister, gan gloi rhodd hael o £30,000 dros dair blynedd sydd wedi cynnal ymdrechion hanfodol i warchod coetiroedd ar hyd a lled y Parc Cenedlaethol. Mae’r cyllid hwn wedi chwarae rhan arwyddocaol o ran gwella tirweddau naturiol Sir Benfro, cynnal bioamrywiaeth, a diogelu cynefinoedd hanfodol.

Mae’r cynlluniau ar gyfer y flwyddyn i ddod yn canolbwyntio ar wella cysylltedd cynefinoedd a chefnogi rhywogaethau allweddol ar draws sawl lleoliad. Bydd gwrychoedd newydd a choed yn y caeau yn cael eu plannu o gwmpas Mynyddoedd y Preseli i greu llwybr hedfan hollbwysig rhwng Coedwig Pengelli a’r Cleddau Ddu, gyda’r nod o gysylltu dwy boblogaeth fridio o ystlumod du, yr unig rai y gwyddys amdanynt yng Nghymru. Yn Freshwater East a Chreseli, bydd ehangu’r gwrychoedd yn gwella cynefinoedd ar gyfer y glöyn byw prin, y brithribin brown, tra bydd gwrychoedd lletach yn y Garn yn gynefin ychwanegol i’r bras melyn, rhywogaeth sy’n bryder cadwraethol.

Diolch enfawr i Loteri Cod Post y Bobl a chymorth y #PostcodeLotteryPeople! Mae eu rhodd hael o £20,000 wedi cynnal 3 o’n prosiectau gwych yn Sir Benfro sy’n gwella bioamrywiaeth, cynhwysiant a llesiant ar draws Arfordir Sir Benfro. Ymhlith y prosiectau penodol sydd wedi elwa o’r cyllid hwn mae’r prosiect Adar a Gwenyn, Llwybrau, a Dewch i’r Awyr Agored.

Rydym yn hynod ddiolchgar bod Cyfoethogi Sir Benfro wedi cyfrannu £15,000 i brosiect Ysgolion Awyr Agored Sir Benfro (PODS) eleni. Mae PODS yn bartneriaeth gydweithredol gydnabyddedig sy’n cynorthwyo holl ysgolion Sir Benfro, eu penaethiaid, staff a’r disgyblion. Bydd y prosiect arfaethedig yn rhoi cyngor a chymorth integredig, hyfforddiant pwrpasol i’r staff addysgu, sesiynau dysgu ysbrydoledig i ddisgyblion yn yr awyr agored, ac yn creu adnoddau dysgu newydd, yn unol â’r cwricwlwm newydd.

Diolch enfawr i Ymddiriedolaeth Elusennol Swire am eu rhodd hael o £11,000 i’r prosiect Llwybrau. Bydd eu cymorth yn cyfrannu at lwyddiant y prosiect yn 2024/2025.

Mae Ymddiriedolaeth Elusennol Arfordir Penfro wrth ei bodd yn cefnogi’r prosiect Llwybrau sy’n chwalu rhwystrau i wirfoddoli ym Mharc Cenedlaethol Arfordir Penfro. Nod y prosiect yw hybu cyfranogiad, yn enwedig ymhlith grwpiau heb gynrychiolaeth ddigonol, gan ddangos manteision gwirfoddoli er lles personol ac i’r amgylchedd.

Mae elusen Ernest Kleinwort wedi ein cynorthwyo sawl gwaith dros y blynyddoedd diwethaf drwy ddarparu cyllid ar gyfer rhai o’n prosiectau adfer byd natur gan gynnwys Creu Mwy o Ddolydd a Gwyllt am Goetiroedd. Rydym wrth ein bodd eu bod wedi darparu gwerth £5000 arall o arian tuag at ein prosiect Adar a Gwenyn. Mae hwn yn brosiect cadwraeth uchelgeisiol gyda’r nod o wrthdroi’r dirywiad sylweddol mewn bioamrywiaeth o fewn ac o gwmpas Parc Cenedlaethol Arfordir Penfro. Rydym yn canolbwyntio ar adfer, creu a diogelu cynefinoedd hanfodol ar gyfer amrywiaeth o rywogaethau sydd dan fygythiad, gan gynnwys adar, gwenyn, gloÿnnod byw, ystlumod, a mathau eraill o fywyd gwyllt. Mae’r prosiectau adfer a chreu cynefinoedd penodol yn cynnwys gwaith ar ddolydd, coetiroedd a gwrychoedd a gwlyptiroedd.

Mae sawl cyngor cymuned wedi dangos eu cefnogaeth i waith y prosiect Ysgolion Awyr Agored Sir Benfro yn 2024 gyda rhoddion hael gan Gyngor Tref Hwlffordd, Cyngor Cymuned Scleddau, a Chyngor Tref Trefdraeth.

Diolch i Ymddiriedolaeth Elusennol Robert Clutterbuck am eu rhodd hael o £1,000 tuag at ein hymgyrch Adar a Gwenyn. Bydd eu cymorth yn ein helpu i wella cynefinoedd ar gyfer pryfed peillio a rhywogaethau adar ledled Sir Benfro, gan sicrhau amgylchedd naturiol ffyniannus ar gyfer cenedlaethau’r dyfodol.